बुटवल । जल तथा मौसम विज्ञान विभागअन्तर्गत मौसम पूर्वानुमान महाशाखाले आजको मौसमी अवस्थाबारे जानकारी दिंदै केही स्थानहरूमा भारी वर्षा हुनसक्ने चेतावनी दिएको छ।
महाशाखाले बिहान ६ बजे प्रकाशित गरेको संक्षिप्त बुलेटिनअनुसार, देशभरका अधिकांश प्रदेशका केही स्थानहरूमा मेघगर्जन र चट्याङसहित हल्कादेखि मध्यम खालको वर्षा हुने सम्भावना रहेको जनाइएको छ।
विशेषगरी कोसी, बागमती, गण्डकी र लुम्बिनी प्रदेशका एक-दुई स्थानहरूमा भारीदेखि अति भारी वर्षाको सम्भावना रहेको उल्लेख गरिएको छ। यस्तै, उच्च पहाडी र हिमाली भूभागहरूमा पनि हल्का वर्षासँगै हिमपात हुन सक्ने अनुमान गरिएको छ।
आज रातिको समयलाई लक्षित गर्दै गरिएको पूर्वानुमानमा कोसी, बागमती, गण्डकी, लुम्बिनी र सुदूरपश्चिम प्रदेशका केही स्थानहरूमा मेघगर्जन र चट्याङसहित मध्यम वर्षा हुन सक्ने जनाइएको छ। त्यसैगरी, कोसी, मधेस, गण्डकी र लुम्बिनी प्रदेशका एक-दुई ठाउँमा भारीदेखि धेरै भारी वर्षा पर्न सक्ने सम्भावना पनि महाशाखाले जनाएको छ।
पुनः हिमाली तथा उच्च पहाडी क्षेत्रका थोरै स्थानमा आज राति पनि हल्का वर्षा र हिमपातको सम्भावना कायम रहेको स्पष्ट गरिएको छ।
