१ कात्तिक, काठमाडौं । तालिबानले पाकिस्तानमाथि युद्धविराम सम्झौता उल्लंघनको आरोप लगाएको छ । तालिबान अधिकारीले सीमावर्ती प्रान्त पक्तिकामा पाकिस्तानले शुक्रबार बम प्रहार गरेर युद्धविराम उल्लंघन गरेको दाबी गरेको हो ।
तालिबान सरकारका एक प्रान्तीय अधिकारीलाई उद्धृत गर्दै बीबीसीले समाचारमा लेखेको छ, ‘पाकिस्तानले पक्तिका प्रान्तको अरघुन जिल्लामा अवस्थित एक घरमा बम आक्रमण गर्यो । उक्त आक्रमणमा नागरिकको मृत्यु र केही घाइते भएका छन् ।’
समाचार एजेन्सी एएफपीले तालिबानका एक वरिष्ठ अधिकारीको नाम उल्लेख नगरी पाकिस्तानले अफगानिस्तानको सीमा पक्तिका प्रान्तमा अभियान स१चालन गरेको समाचारमा उल्लेख छ ।
पाकिस्तानका तर्फबाट युद्धविराम उल्लंघन र अफगानिस्तानमा भएको भनिएको आक्रमणबारे कुनै बयान भने आएको छैन ।
यसअघि तालिबानका प्रवक्ता जबीहुल्लाह मुजाहिदले पाकिस्तान र अफगानिस्तानबीच युद्धविरामको पुष्टि गरेका थिए ।
पाकिस्तान र अफगानिस्तान कयौँ झडपका घटना पछि गत बुधवार ४८ घण्टे युद्धविरामका लागि सहमत भएका थिए । दुवै देशबीच कतारको मध्यस्थतामा दोहामा वार्ता चलिरहेको छ ।
