४ मंसिर, काठमाडौं । गाजामा इजरायली आक्रमणबाट कम्तिमा पनि २५ प्यालेस्टाइनीको मृत्यु भएको हमासको स्वास्थ्य मन्त्रालयले जनाएको छ ।
उद्धारकर्मीहरूका अनुसार गाजा शहरको के–जेतुन क्षेत्रमा अवस्थित एक भवनमा मात्रै एक महिला र एक बालिकासहित १० जनाको मृत्यु भएको छ ।
इजरायली सेनाले पनि ‘हमासको आतंकवादी ठेगाना’ मा आक्रमण गरिएको बताएको छ ।
केही बन्दुकधारी समूहले दक्षिणी शहर खान युनिसमा तैनाथ सेनामाथि पाँच साता पुरानो युद्धविरामको उल्लंघन गर्दै गोली प्रहार गरेको इजरायली सेनाको भनाइ छ ।
हमासका तर्फबाट इजरायली सेनाको दाबीमाथि कुनै प्रतिक्रिया आएको छैन ।
हमासको सिभिल डिफेन्स एजेन्सीका प्रवक्ता महमुद बस्सलले बीबीसीसँग बुधवार बेलुकी गाजा शहर र खान युनिसका कयौं स्थानमा इजरायलले आक्रमण गरेको प्रतिक्रिया दिएका छन् ।
उने कयौं दिनको शान्ति पछि इजरायलले आक्रमणलाई तीव्रता दिएको पनि बताएका छन् ।
