<strong>२५ साउन, काठमाडौं । </strong>राष्ट्रिय स्वतन्त्र पार्टी (रास्वपा)की सांसद लिमा अधिकारीले नागरिकको भान्सा सहज बनाउन सरकारसँग माग गरेकी छिन् ।
सोमबार प्रतिनिधिसभा बैठकको शुन्य समयमा सांसद अधिकारीले ग्यासको अभावका कारण नागरिकले सास्ती भोग्नुपरेको भन्दै छिटो भन्दा छिटो नागरिकको भान्सा सहज बनाउन सरकारसँग माग गरिन् ।
‘सर्वसाधारण नागरिकहरू छाक टार्नका लागि मध्यरातिसम्म खाली ग्यास सिलिन्डर बोकेर लाइनमा बस्न बाध्य भएको स्थितिप्रति सरकारको ध्यानाकर्षण गराउन चाहन्छु,’ उनले भनेकी छिन् ।
एकातिर देशमा उत्पादित बिजुली खेर गइरहेको र अर्कोतिर ग्यासका लागि नागरिकले सास्ती भोग्नुपरेको अवस्था विडम्बनापूर्ण रहेको उनको भनाइ छ ।
ग्यासको लाइन हटाउन सरकारले तत्काल इन्डक्सन चुलो वितरण गर्ने योजना ल्याउनुपर्ने धारणा पनि उनले राखिन् ।
साथै उनले विद्युत् खपतमा लगाइएका नीतिहरूले वैकल्पिक इन्धन वा विद्युतीय चुलोको प्रयोगलाई निरुत्साहित गरेको हुनसक्ने भएको यसतर्फ गम्भीर बन्न सरकारलाई आग्रह गरिन् ।
स्वदेशी भान्सा हाम्रो साझा प्रतिबद्धता हो भन्दै नागरिकलाई गरेको बाचा र प्रतिबद्धता भुल्न नहुने उनको भनाइ छ ।
