२३ कात्तिक, काठमाडौं । सुपरमादी हाइड्रोपावरको नाफा ५० प्रतिशतले बढेको छ ।
कम्पनीले सार्वजनिक गरेको चालु आर्थिक वर्षको पहिलो त्रैमासिक वित्तीय विवरणअनुसार यस अवधिमा खुद नाफा १६ करोड १३ लाख रुपैयाँ छ । गत आवको पहिलो त्रैमासमा खुद नाफा १० करोड ६९ लाख रुपैयाँ थियो ।
कम्पनीको बिक्री आम्दानी घटे पनि नाफा बढेको देखिन्छ । बिक्री आम्दानी पहिले ४३ करोड २७ लाख रुपैयाँ रहेकोमा अहिले ४२ करोड १५ लाख रुपैयाँ छ । बिक्री आम्दानी घट्दा पनि नाफा बढ्नुको प्रमुख कारण वित्तीय लागत घट्नु हो ।
वित्तीय लागत पहिले २३ करोड १३ लाख रुपैयाँ रहेकोमा अहिले १६ करोड ३५ लाखमा झरेको छ । बैंकको घट्दो ब्याजदरले हाइड्रोपावर कम्पनीहरुको वित्तीय विवरणमा सकारात्मक प्रभाव पार्दछ ।
कम्पनीको वार्षिक प्रतिसेयर आम्दानी ३० रुपैयाँ ७२ पैसा छ । प्रतिसेयर नेटवर्थ ११४ रुपैयाँ ३१ पैसा छ । हाल यस कम्पनीको सेयर मूल्य प्रतिकित्ता ६७५ रुपैयाँ छ ।
