काठमाडौं — अमेरिकी पूर्वराष्ट्रपति डोनाल्ड ट्रम्पले इजरायलले गाजामा ६० दिने युद्धविरामका लागि आवश्यक शर्तहरूमा सहमति जनाएको दाबी गरेका छन्।
सामाजिक सञ्जाल ट्रुथ सोसलमा लेख्दै ट्रम्पले युद्ध अन्त्यका लागि सबै पक्षसँग मिलेर काम गरिने बताएका छन्। तर, उनले ती शर्तहरू के हुन् भन्नेबारे विस्तृत जानकारी भने दिएका छैनन्।
उनले भनेका छन्, “कतार र इजिप्टले शान्तिका लागि निकै मिहिनेत गरिरहेका छन् र उनीहरू नै अन्तिम प्रस्ताव अगाडि ल्याउने छन्। मलाई पूर्ण आशा छ कि हमासले यो प्रस्ताव स्वीकार गर्नेछ, किनकि योभन्दा राम्रो विकल्प उनीहरूसँग छैन।”
सन् २०२३ को अक्टोबर ७ मा हमासले इजरायलमाथि आक्रमण गरेपछि द्वन्द्व सुरु भएको थियो। त्यस आक्रमणमा करिब १,२०० जना इजरायलीको ज्यान गएको थियो। त्यसपछि इजरायलले गाजामा व्यापक सैन्य कारबाही थालेको थियो।
हमास नियन्त्रित स्वास्थ्य मन्त्रालयका अनुसार, इजरायली आक्रमणमा गाजामा कम्तीमा ५६ हजार ६४७ जनाको ज्यान गइसकेको छ।
हाल गाजामा करिब ५० जना इजरायलीहरू बन्धक अवस्थामा रहेको र तीमध्ये कम्तीमा २० जना जीवित भएको विश्वास गरिन्छ।
ट्रम्पको यो घोषणा इजरायली प्रधानमन्त्री बेन्यामिन नेतन्याहूसँगको बैठकको केही दिनअगाडि आएको हो। ट्रम्पले नेतन्याहू पनि गाजाको द्वन्द्व अन्त्य गर्न इच्छुक रहेको बताउँदै आगामी सातामै सम्झौता हुन सक्ने विश्वास व्यक्त गरेका छन्।
यद्यपि इजरायलले हालसम्म हमासलाई पूर्ण रूपमा समाप्त नगरी युद्धविराम नहुने अडान लिँदै आएको छ भने, हमासले स्थायी युद्धविराम र इजरायली फौजको गाजाबाट पूर्ण फिर्ता माग गर्दै आएको छ।
बीबीसीका अनुसार, मध्यस्थकर्ताहरूले युद्धविराम र बन्धकको रिहाइका लागि प्रयास तीव्र पारे पनि इजरायल–हमासबीचको औपचारिक वार्ता भने हाल रोकिएको अवस्थामा छ।
