२४ पुस, काठमाडौं । तराईका जिल्लामा कुहिरो र शीतलहरले जनजीवन प्रभावित भएको छ । सडक क्षेत्र पानी परेजस्तो छपक्कै भिजेको छ । दिउँसो १२ बजेसम्म घाम पनि राम्रोसँग लागेको छैन ।
रुपन्देहीको बुटवल र कपिलवस्तुको गोरुसिंगे खण्डको सडक छपक्कै भिजेको सो सडक भएर यात्रा गर्नेहरुले बताएका छन् । ‘बाहिर निस्किँदा शरीर नै भिज्छ, राजमार्गमा हेर्दा पानी पोखिएजस्तो छ,’ एक यात्रीले भने ।
लुम्बिनी प्रदेशकै नवलपरासी पश्चिमको बर्दघाट नगरपालिका ४ स्थित खुर्सानी खोलामा पनि सडक पानीले भिजेको देखिन्छ । जसका कारण सडक चिप्लो हुँदा सवारी आवागमन नै प्रभावित भएको छ ।
नवलपरासी पश्चिम प्रहरीका अनुसार मंगलबार मध्यरातिदेखि बुधबार बिहानसम्म पनि राम्रोसँग सवारी साधन सन्चालन हुन सकेका छैनन् । पहाडको घुमाउरो बाटो भिजेर चिप्लो हुँदा गाडी नै चलाउन नसकिएको एक चालकले बताए । उनका अनुसार अत्यधिक जाडो पनि भएकाले हात कठ्याङ्ग्रिएर स्टेरिङ चलाउन पनि समस्या भएको छ ।
नवलपरासी पश्चिम प्रहरीबाट प्राप्त फोटो र भिडियो हेर्दा राजमार्ग क्षेत्रमा रोकिएका गाडीहरुको लामो लाइन देखिन्थ्यो । प्रहरीहरु सो क्षेत्रमा रेनकोट लगाएर ड्युटीमा खटिएको देखिन्छ ।
मौसमविद के भन्छन् ?
जल तथा मौसम विज्ञान विभागको मौसम पूर्वानुमान महाशाखाले शीतलहरको घोषणा भने गरिसकेको छैन । मौसमविद गोविन्द झा आफूहरुले सुक्ष्म अवलोकन गरिरहेको र सबै क्राइटेरिया पूरा भएमात्र शीतलहर चलेको घोषणा गर्ने बताउँछन् ।
उनका अनुसार अधिकतम र न्यूनतम तापक्रमबीच पाँच डिग्री सेल्सियस फरक, पारदर्शिता एक किलोमिटरभन्दा कम र पानी तपतप चुहिने अवस्था लगातार तीन दिनसम्म भयो भने शीत लहर चलेको घोषणा गरिन्छ । ‘हिजो र आजको जस्तै अवस्था अब भोलि पनि भयो भने शीतलहरको घोषणा हुनसक्छ,’ मौसमविद झा भन्छन्, ‘हामीले नजिकबाट अवलोकन गरिरहेका छौं ।’
