काठमाडौँ । सर्वोच्च अदालतमा आज (शुक्रबार) चार वटा इजलासमा भ्रष्टाचारसम्बन्धी ११७ थान मुद्दा पेसीमा तोकिएको छ । सर्वोच्च अदालतले २०७७ पछि दर्ता भएका घुससँग जोडिएका भ्रष्टाचार मुद्दा एक साथ पेसीमा तोकेकाे हो ।
सर्वोच्चले भ्रष्टाचारसम्बन्धी मुद्दालाई प्राथमिकतामा राखेर दुई महिनाअघि देखि एकै प्रकृतिको मुद्दाका लागि इजलास गठन गर्दै आइरहेको छ ।
शुक्रबार न्यायाधीशद्वय कुमार रेग्मी र श्रीकान्त पौडेलको संयुक्त इजलासमा घुससँग सम्बन्धित ३० थान मुद्दा पेसीमा तोकिएको छ । त्यस्तै न्यायाधीश हरिप्रसाद फुयाँल र न्यायाधीश शान्तिसंह थापाको संयुक्त इजलासमा २९ थान पेसी रहेको छ ।
साथै न्यायाधीशद्वय कुमार चुडाल र नृपध्वज निरौलाको संयुक्त इजलासमा २९ थान मुद्दा पेसी तोकिएको छ । साथै न्यायाधीशद्वय तिलप्रसाद श्रेष्ठ र टेकप्रसाद ढुङ्गानाको संयुक्त इजलासमा २९ थान पेसी तोकिएको हो ।















