काठमाडौँ । साउन ११ गते नागरिक उन्मुक्ति पार्टी (नाउपा)की अध्यक्ष रञ्जिता श्रेष्ठले कास्कीका शिव बाँस्तोलालाई कार्यवाहक तोकिन् । यसपछि नाउपाभित्र आन्तरिक विवाद तीव्र बनेको छ ।
पार्टीका बहुमत केन्द्रीय सदस्यले बैठक बोलाउन माग गरिरहेका बेला श्रेष्ठले बास्तोलालाई कार्यवाहक अध्यक्षको जिम्मेवारी दिएपछि पार्टीभित्रको विवाद थप बढेको हो । अध्यक्ष श्रेष्ठले पार्टीको बैठक नबोलाएपछि साउन ११ गते नै बहुमत केन्द्रीय सदस्यको बैठक बस्यो ।
उक्त बैठकले अध्यक्ष श्रेष्ठले कार्यवाहक तोकेकोप्रति आपत्ति जनाउँदै थप निर्णयका लागि पार्टीको राष्ट्रिय भेला बोलाएको रामलाल डगोरा बताउँछन् । केन्द्रीय समिति बैठकले अध्यक्ष श्रेष्ठले पार्टी हित विपरीत कार्य गरेकोमा खेद प्रकट गर्दै राष्ट्रिय भेलाको आह्वान गरेको डगौराले जनाए ।
बैठक नबोलाएर कार्यवाहक तोकेको विषयमा केन्द्रीय समितिले अध्यक्ष श्रेष्ठलाई स्पष्टीकरण सोधेको छ । अहिलेसम्म श्रेष्ठले स्पष्टीकरणको जवाफ नदिएको नेता डगौराले बताए ।
‘आज (मंगलबार)सम्म उहाँको जवाफको प्रतिक्षा गर्छौं, यदि आएन भने भोलि राष्ट्रिय भेलाबाट थप निर्णय लिन्छौं ।’
श्रेष्ठको जवाफ चित्तबुझ्दो नभएमा राष्ट्रिय भेलाले कडा निर्णय गर्ने भनिएको छ । जसको अर्थ उनलाई अध्यक्षबाट हटाउनेसम्मको निर्णय हुने डगौरा बताउँछन् ।
यता अध्यक्ष श्रेष्ठ बुधबारका लागि बोलाइएको राष्ट्रिय भेला अवैधानिक रहेको बताउँछन् । पार्टीको केन्द्रीय समिति वा अन्य कुनै वैधानिक निकायबाट नभएकाले केही व्यक्तिको पहलमा भेला बोलाइनुको अर्थ नहुने उनको जिकिर छ ।














