असार १, काठमाडौं — नेपाली कांग्रेसले राष्ट्रिय स्वतन्त्र पार्टी (रास्वपा)लाई नैतिकताको पाठ नपढाउन आग्रह गरेको छ। आइतबार प्रतिनिधि सभाको आकस्मिक समयमा बोल्दै कांग्रेसका प्रमुख सचेतक श्यामकुमार घिमिरेले रास्वपामाथि प्रश्न उठाएका हुन्।
गृहमन्त्रीको राजीनामा माग गरिरहेको रास्वपाको आलोचना गर्दै घिमिरेले अध्यागमन र भिजिट भिसासम्बन्धी मामिलामा अख्तियारले एकजना सहसचिवसँग सोधपुछ गरेको भरमा मन्त्रीले राजीनामा दिनुपर्ने माग नै गलत रहेको बताए। रास्वपाले भने मन्त्रालय अन्तर्गतका अधिकारी छानबिनमा परेको कारण गृहमन्त्रीले नैतिकताका आधारमा राजीनामा दिनुपर्ने अडान राख्दै आएको छ।
तर घिमिरेले भने, सोही नैतिकताको मापदण्ड प्रयोग गर्दा रास्वपाले आफ्नै अध्यक्ष रवि लामिछानेलाई सभापतिमा राखिराख्नु कति जायज हो भन्ने प्रश्न उठाएका छन्। उनले लामिछानेविरुद्ध सहकारी ठगी, संगठित अपराध र सम्पत्ति शुद्धीकरणसम्बन्धी मुद्दा पाँचवटै अदालतमा विचाराधीन रहेको र सर्वोच्च अदालतले समेत थुनामा राखेर पुर्पक्षमा पठाउन आदेश दिएको स्मरण गराउँदै यस्तो व्यक्ति पार्टी सभापति रहनु नैतिकताविपरीत भएको बताए।
त्यसैगरी, प्रतिनिधिसभा सदस्य पदबाट निलम्बनमा रहेका लामिछाने कसरी रास्वपाको संसदीय दलको नेता भइरहन सक्छन् भन्ने प्रश्नसमेत उनले उठाएका छन्। कांग्रेसको धारणा छ कि यस्तो परिस्थितिमा रास्वपाले अरूलाई नैतिकताको शिक्षा दिन सक्दैन।














