तिलोत्तमा, १७ असार ।
संस्थागत सामाजिक उत्तरदायित्व (CSR) लाई सधैं जनताको सुख-दुःखसँग जोड्दै आएको आईसीएफसी फाइनान्स लिमिटेड, ड्राइभरटोल शाखाले स्थानीय समुदायमा एक सराहनीय कार्य गरेको छ। बढ्दो अत्यधिक गर्मीलाई मध्यनजर गर्दै फाइनान्सले तिलोत्तमा नगरपालिका वडा नं. १ का आर्थिक रूपमा विपन्न तथा गरिब परिवारहरूलाई सितलता प्रदान गर्ने उद्देश्यले एक भब्य कार्यक्रमका बीच ‘स्ट्यान्ड फ्यान‘ (टेबल फ्यान) वितरण गरेको छ।
बुधबार आयोजित उक्त राहतमुखी कार्यक्रमको औपचारिक शुभारम्भ अतिथिहरूको आसन ग्रहणसँगै भएको थियो। कार्यक्रममा उपस्थित स्थानीयहरूलाई स्वागत गर्दै संक्षिप्त शुभकामना मन्तव्य व्यक्त गरिएको थियो।
स्थानीय जनप्रतिनिधिहरूको उत्साहजनक उपस्थिति
तिलोत्तमा नगरपालिका वडा नं. १ का वडा अध्यक्ष श्री फरशुराम गिरीको प्रमुख आतिथ्यतामा सम्पन्न भएको उक्त कार्यक्रममा वडा सदस्यहरू श्रीमती गीता देवी न्यौपाने, हीरा देवी बी.के. र विष्णु प्रसाद पाण्डेय विशिष्ट अतिथिका रूपमा उपस्थित हुनुहुन्थ्यो। प्रमुख अतिथि तथा विशिष्ट अतिथिहरूले फाइनान्सको यस मानवीय कार्यको खुलेर प्रशंसा गर्दै आगामी दिनमा पनि यस्ता जनमुखी कार्यक्रमहरूले निरन्तरता पाउने विश्वास व्यक्त गर्नुभयो।
भाषणबाजी र औपचारिक प्रकृयामा अल्झिनुभन्दा सेवाग्राहीको समयलाई उच्च कदर गर्दै कार्यक्रममा छिटो-छरितो रूपमा लक्षित विपन्न परिवारहरूलाई स्ट्यान्ड फ्यान वितरण गरिएको थियो। गर्मीको यो मौसममा हातैमा सितल ओढ्ने फ्यान पाएपछि स्थानीय लाभग्राहीहरूको अनुहारमा खुसीको बहार छाएको थियो।
फ्यान वितरण लगत्तै अतिथि श्री महेन्द्र सुवेदीले संस्थाको सामाजिक उत्तरदायित्व र यस्ता परोपकारी कार्यक्रमहरूको महत्वबारे प्रकाश पार्दै छोटो तर निकै प्रेरणादायी मन्तव्य राख्नुभएको थियो। वित्तीय कारोबार मात्र नभई समुदायको सुख-दुःखमा मलम लगाउनु फाइनान्सको मुख्य उद्देश्य रहेको उहाँले स्पष्ट पार्नुभयो।
कार्यक्रमको अन्त्यमा टोल विकास सञ्जाल समितिका अध्यक्ष श्री टोपलाल भण्डारीले धन्यवाद ज्ञापन गर्नुभएको थियो। उहाँले विपन्न वर्गको समस्यालाई बुझेर तत्काल राहत स्वरूप फ्यान वितरण गरेकोमा आईसीएफसी फाइनान्स परिवारप्रति आभार प्रकट गर्दै कार्यक्रमको औपचारिक समापन गर्नुभयो।
पूर्ण रूपमा सौहार्दपूर्ण र व्यवस्थित वातावरणमा सम्पन्न यस कार्यक्रमले आर्थिक रूपमा कमजोर परिवारलाई टन्टलापुर गर्मीमा ठूलो राहत पुर्याएको छ। बैंकिङ सेवाका साथसाथै सामाजिक उत्तरदायित्व वहन गरेर आईसीएफसी फाइनान्सले समुदाय र संस्थाबीचको सम्बन्धलाई अझ प्रगाढ र सुदृढ बनाएको स्थानीय बुद्धिजीवीहरूको भनाइ छ।
उक्त गरिमामय कार्यक्रमको सञ्चालन भने आईसीएफसी फाइनान्स लिमिटेड, ड्राइभरटोल शाखाका प्रबन्धक (Branch Manager) श्री सन्तोष बहादुर एम.सी. ज्यूले गर्नुभएको थियो। आफ्नो कुशल र प्रभावकारी उद्घोषण शैलीका माध्यमबाट उहाँले कार्यक्रमलाई चुस्त, व्यवस्थित र रोचक ढंगले अगाडि बढाउनुभएको थियो। कार्यक्रमको सुरुवाती आसन ग्रहणदेखि समापनसम्मका हरेक चरणलाई समयको सीमाभित्रै रहेर सहजीकरण गर्दै उहाँले उपस्थित अतिथि र स्थानीयको ध्यान केन्द्रित गर्न सफल हुनुभयो। संस्थाको सामाजिक उत्तरदायित्वलाई समुदायमाझ प्रस्ट पार्दै कार्यक्रमलाई उर्जावान् र भव्य बनाउन शाखा प्रबन्धक एम.सी. ज्यूले महत्त्वपूर्ण भूमिका निर्वाह गर्नुभएको थियो।
