नयाँ दिल्ली । भारतीय विदेशमन्त्री एस जयशंकरले अमेरिकी चुनावी नतिजाबाट भारत ‘नर्भस’ नभएको बताएका छन् । आइतबार साँझ मुम्बईमा आदित्य बिर्ला समूहको छात्रवृत्ति कार्यक्रमको रजत जयन्ती समारोह कार्यक्रमलाई सम्बोधन गर्दै जयशंकरले सो कुरा बताएका हुन् ।
सम्बोधनपछि उनले केही प्रश्नको जवाफ पनि दिए । जसमा उनलाई अमेरिकी चुनावी नतिजाबारे पनि प्रश्न गरिएको थियो । जयशंकरलाई सोधिएको थियो, ‘अमेरिकी चुनावको नतिजालाई भारत–अमेरिका सम्बन्धको परिप्रेक्ष्यमा कसरी हेर्नुहुन्छ ? विशेष गरी प्रधानमन्त्री मोदीले ट्रम्पलाई दिएको बधाई र दुईबिचको सम्बन्धलाई लिएर ?’
यसबारे जयशंकरले भने, ‘प्रधानमन्त्री पहिलो तीन व्यक्तिमध्ये एक थिए जसको फोन नयाँ राष्ट्रपति डोनाल्ड ट्रम्पले उठाएका थिए । प्रधानमन्त्रीको आफ्नो कार्यकालमा सबै राष्ट्रपतिहरूसँग राम्रो सम्बन्ध रहेको छ। चाहे त्यो ओबामा होस् वा ट्रम्प वा बाइडेन।’
उनले भने, ‘यस अवस्थाले धेरै सहयोग गरेको छ । भारतमा भइरहेको परिवर्तनले पनि सहयोग गरेको छ । मलाई थाहा छ संसारका धेरै देशहरू अमेरिकालाई लिएर आतङ्कित अवस्थामा छन्, तर मलाई यो स्पष्ट गर्न दिनुहोस् कि भारत ती मध्ये एक होइन।’
@एजेन्सी
