काठमाडौं — नेपाल उद्योग वाणिज्य महासङ्घका अध्यक्ष चन्द्रप्रसाद ढकालले स्पेनका उद्यमी र व्यवसायीहरूलाई नेपालमा लगानी गर्न खुला निम्तो दिएका छन्। उनले नेपालमा हाल लगानीमैत्री वातावरण निर्माण भइसकेको भन्दै ढुक्क भएर लगानी गर्न आग्रह गरेका हुन्।
बुधबार म्याड्रिडस्थित नेपाली दूतावासले आयोजना गरेको विशेष कार्यक्रममा सम्बोधन गर्दै अध्यक्ष ढकालले पर्यटन, ऊर्जा, कृषि, सूचना प्रविधि तथा पूर्वाधार क्षेत्रमा लगानीका उल्लेखनीय सम्भावना रहेको उल्लेख गरे। कार्यक्रममा स्पेन वाणिज्य तथा उद्योग महासङ्घका सदस्य, स्थानीय व्यवसायी, नेपाली समुदायका प्रतिनिधि तथा कूटनीतिक अधिकारीहरूको सहभागिता रहेको थियो।
अध्यक्ष ढकालले नेपालको पर्यटन क्षेत्रलाई देशको अर्थतन्त्रको मेरुदण्डका रूपमा चिनाउँदै, विशेषतः सगरमाथा, लुम्बिनी जस्ता विश्वप्रसिद्ध गन्तव्यहरूप्रति पर्यटकहरूको आकर्षण बढ्दो रहेको बताए। “यदि गुणस्तरीय सेवा र पूर्वाधारमा लगानी गरियो भने नेपाललाई अन्तर्राष्ट्रिय पर्यटकहरूको रोजाइमा पार्न सकिन्छ,” उनले जोड दिए।
महासङ्घका अनुसार, अध्यक्ष ढकालको यो अभिव्यक्ति नेपालमा प्रत्यक्ष विदेशी लगानी (FDI) प्रवाह बढाउने दिशामा सकारात्मक सन्देश दिने विश्वास गरिएको छ।
















