काठमाडौँ — लिभरपुलको इंग्लिस प्रिमियर लिग जित्ने अभियानमा नटिङघम फरेस्टले मंगलबार धक्का दिएको छ । अंक तालिकाको शीर्ष दुई स्थानमा रहेका टिमबीचको खेल १–१ को बराबरीमा टुंगियो ।
यस्तै म्यानचेस्टर सिटी पनि ब्रेन्टफोर्डको हातबाट २–२ को बराबरीमा रोकिएको छ । चेल्सीले पनि बनर्थमाउथसँग २–२ कै बराबरी खेल्यो । वेस्ट् हयामले भने फुलहमलाई ३–२ ले पराजित गर्यो ।
सिटी ग्राउन्डमा भएको खेलमा फरेस्टले क्रिस उडको गोलले अग्रता लिएको थियो । लिभरपुलका लागि भने डिएगो जोटाले बराबरी गोल फर्काए । यो नतिजापछि शीर्षमा लिभरपुलको छ अंकको अग्रता कायम रह्यो ।
‘आजको खेलमा हामीले धेरै अवसर सिर्जना गर्यौं, त्यसैले म टिमको प्रदर्शनबाट खुसी छुं । विशेष दोस्रो हाफमा हाम्रो प्रदर्शन उत्कृष्ट रह्यो । खालि हामीले निर्णायक गोल मात्रै निकाल्न सकेनौं,’ लिभरपुलका प्रशिक्षक आर्ने स्लटले भने ।
सिटीले भने फिल फोडेनको दुई गोलले सुरुआती अग्रता लिएको थियो । तर ब्रेन्टफोर्डले अन्तिम १० मिनेटको खेलमा दुई गोल फर्काएको थियो ।
