१९ मंसिर, काठमाडौं। सत्ता साझेदार दुई दल नेपाली कांग्रेस र नेकपा एमालेले १६ मंसिरको स्थानीय तह उपनिर्वाचन परिणामको समीक्षा गर्ने भएका छन् । अपेक्षित परिणाम नआएपछि नेपालका प्रमुख दुई दलले समीक्षा गर्ने भएका हुन् ।
४४ स्थानका लागि भएको उपनिर्वाचनमा १९ स्थान जितेर कांग्रेस पहिलो शक्ति बन्दा ११ स्थान जितेर माओवादी दोस्रो र ८ स्थान जितेर एमाले तेस्रो बनेका थिए । २०७९ सालको निर्वाचनमा कांग्रेसले जितेका २७ स्थानमा निर्वाचन भए पनि ८ स्थान कांग्रेसले गुमाएको थियो ।
नेकपा एमालेका वरिष्ठ उपाध्यक्ष ईश्वर पोखरेल स्थानीय तह उपनिर्वाचनबाट निराश हुनुनपर्ने तर पार्टीका तर्फबाट भएका कमी कमजोरीबारे समीक्षा गर्ने बताए । आफ्नो पकड क्षेत्र भएका ठाउँमा पनि मत घटेकोप्रति समीक्षा गर्ने उनको भनाइ छ ।
‘उपनिर्वाचनको परिणाम निराशाजनक छैन । उपनिर्वाचनमा हामीले गत निर्वाचनमा पराजित भएका ठाउँहरुमा पनि जितेका छौं,’ पोखरेलले भने, ‘अरु पार्टीहरुले लामो समयदेखि जित्दै आएका ठाउँहरुमा पनि जितेका छौं ।
केही हामी आफ्नो पकड भएको क्षेत्रमा पराजित भएको अवस्था पनि छ । तर उपनिर्वाचनको समग्र रिपोर्ट आइसकेपछि हामी समिक्षा पनि गरौंला । हामीले आफ्नो शक्ति विन्यास गर्ने कुरामा कतै तलमाथि भयो कि त्यो बुझौंला ।’
यसैगरी नेपाली कांग्रेसका महामन्त्री विश्वप्रकाश शर्माले पनि उपनिर्वाचनको प्रारम्भिक समीक्षा सार्वजनिक गरिसकेको उल्लेख गर्दै पार्टी सचिवालय गम्भिर समीक्षामा जुटेको बताए ।
‘प्रत्येक वडा र पालिकामा गम्भिर रुपमा अगाडिको निर्वाचन र पछिल्लो निर्वाचनको अंकगणित के रह्यो ? उपलब्धि हुँदै गर्दा कसरी भयो ? गुम्दै गर्दा कसरी गुम्यो ? भन्ने कुरा हामो सचिवालयले तथ्यांकसहित सबै तयारी गरिरहेकै छ,’ महामन्त्री शर्माले भने, ‘नेपाली कांग्रेस पार्टीले अहिलेको चुनावमा कहाँ कमजोरी भयो त्यसको पनि समीक्षा गर्दैछ ।’
यद्यपि स्थानीय तह उपनिर्वाचन परिणामले राजनीतिक दलहरुलाई घचघचाएको भन्दै त्यसलाई पार्टीले सकारात्मक रुपमा लिएको उनले बताए । उपनिर्वाचनमा मतदाताको उत्साहजनक सहभागिता, मुख्य राजनीतिक दलहरुले पाएको मत, प्रणालीप्रतिको विश्वास, यही प्रणालीबाट समुन्नतिको बाटोमा हिँड्नुपर्छ भनेर प्राप्त जनादेशलाई पुनर्ताजगी गरेको रुपमा बुझ्नुपर्ने उनको भनाइ छ ।
