२४ पुस, काठमडौं । त्रिभुवन विश्वविद्यालयको केन्द्रीय क्याम्पसमा एक महिनादेखि ताला लागेको छ । पार्किङ शुल्कको विषयमा पाँच विद्यार्थी संगठनले २५ मंसिरमा ताला लगाएका थिए ।
तर, अहिलेसम्म पनि सहमति भएको छैन । एक महिनादेखि तला लाग्दा दैनिक कामकाज ठप्प भएको छ ।
‘शिक्षक कर्मचारीलाई तलब खुवाउने बेला भयो । ताला लागेका कारण दैनिक कामकाज गर्न पाएका छैनौं,’ क्याम्पसका प्रिन्सिपल ध्यानेन्द्र राईले भने ।
प्रिन्सिपल कार्यालयमा लगाइएको ताला खुलाउने विषयमा छलफल भइरहेको राईले बताए । ‘छलफल गरिरहेका छौं । सहमतिको प्रयास भइरहेको छ,’ उनले भने ।
त्रिविको स्वतन्त्र विद्यार्थी युनियन (स्ववियु) ले नेपाल प्रिमियर लिग (एनपीएल) को पहिलो दिन पार्किङबाट अपारदर्शी ढंगले शुल्क उठाएको आरोपमा पाँच विद्यार्थी संगठनले ताला लगाएका छन् ।
तर, स्ववीयुका पदाधिकारीहरूले आफूहरूले शुल्क नउठाएको दाबी गर्दै आएका छन् । ताला लगाउनेमा अखिल क्रान्तिकारी, अनेरास्ववियू, अखिल छैटौं, अखिल समाजवादी, नेपाल समाजवादी विद्यार्थी युनियन रहेका छन् ।
यही विषयमा स्ववियूको कार्यालय र रजिस्ट्रार कार्यालय अन्तर्गतको सामान्य प्रशासन महाशाखामा पनि ताला लगाइएको छ ।
