९ कात्तिक, काठमाडौं । रघुराम विष्ट सचिव बढुवा भएका छन् । बिहीबार बसेको मन्त्रिपरिषद् बैठकले विष्टलाई सचिवमा बढुवा गरेको हो ।
सचिव बढुवा सिफारिस समितिको बैठकले प्रशासन सेवातर्फ विशिष्ट श्रेणीको सचिव पदमा सहसचिव विष्टको नाम सिफारिस गरेको थियो ।
५ कात्तिकमा सार्वजनिक खरिद अनुगमन कार्यालयका सचिव रामकृष्ण सुवेदी अवकास भएसँगै रिक्त पदमा सचिव विष्ट बढुवा भएका हुन् ।
४ पटक लगातार कार्यसम्पादन मूल्यांकन नम्बरका आधारमा एक सचिवका लागि तीन जनाको नाम सिफारिस गरेपछि पाँचौं पटक ज्येष्ठताका आधारमा एक जना मात्रै नाम सिफारिस गर्ने गरिन्छ ।
यसअघि ४ पटक कार्यसम्पादन मूल्यांकनलाई आधार बनाएर तीन–तीन जनाको नाम बढुवा सिफारिस भएकाले अहिले ज्येष्ठताका आधारमा बिष्ट सिफारिस भएका थिए ।
उनलाई गण्डकी प्रदेशको प्रमुख सचिवको जिम्मेवारी दिएर पदस्थापन गरिएको छ । यसअघि पनि उनी गण्डकीमै कायममुकायम प्रमख सचिव थिए ।
