काठमाडौँ । अन्तर्राष्ट्रिय हवाई भाडा दोब्बरले बढाएको भन्दै म्यानपावर व्यवसायीहरूले आपत्ति जनाएका छन् । नेपाल वैदेशिक रोजगार व्यवसायी संघले वैदेशिक रोजगारीमा जाने श्रमिकको हवाई भाडा अत्यन्तै महँगो बनाइएको भन्दै आपत्ति जनाएको हो ।
संघले श्रम, रोजगार तथा सामाजिक सुरक्षा मन्त्रालयलाई ज्ञापनपत्र बुझाएको छ । जसमा उनीहरूले हवाई भाडामा कालोबजारी रोक्न माग गरेका छन् ।
वैदेशिक रोजगारमा जाने श्रमिकहरूले अत्यन्त महँगो दरमा विदेश जाने हवाई टिकट खरिद गर्नु परेको र हवाई कम्पनीहरूले दिनदिनै भाडा वृद्धिगरी रहेको उनीहरूको गुनासो छ ।
मलेसिया तथा अन्य गन्तव्य मुलुकमा दैनिक १५०० कामदार वैदेशिक रोजगारीका लागि जाने गरेका छन् । तर केही सीमित एयरलाइन्सहरूको मिलेमतोमा कृत्रिम अभाव खडा गरी कालोबजारी गरेको सङ्घको ठहर छ ।
अन्तर्राष्ट्रिय विमानस्थललाई स्तरोन्नतिको नाममा दैनिक १० घण्टा बन्द गरिएको कारण देखाउँदै हवाई कम्पनीहरूले सामान्यतया ३० देखि ३५ हजार रुपैयाँमा नियमित पाउने टिकटलाई अहिले ७० देखि ८० हजार रुपैयाँ तिर्नुपर्ने सङ्घको भनाइ छ ।
दोब्बर मूल्यको टिकटमा कामदार जान बाध्य भएकोले उक्त कालो बजारीलाई रोकेर सस्तो र सुलभ एवम् नियमित टिकटको मूल्यमा कामदार जान पाउने व्यवस्था गर्न समेत संघले माग गरेको छ ।
