काठमाडौँ । राष्ट्रिय स्वतन्त्र पार्टी (रास्वपा) मंसिर १६ गते हुने स्थानीय तह उपनिर्वाचनमा जिल्ला समन्वय समितिबाहेक ४२ वटै पदमा उम्मेदवारी दर्ता गराउने भएको छ ।
आइतबार पार्टी कार्यालयमा पत्रकार सम्मेलन गर्दै रास्वपा नेता गणेश पराजुलीले अवरोध र धम्की आउने डरले उम्मेदवारहरूको नामावली सार्वजनिक नगरेको तर आजै ५ बजे सबै उम्मेदवारको नाम सार्वजनिक गर्ने जानकारी दिए ।
पत्रकार सम्मेलनमा रास्वपाले आफ्नो पार्टीका उम्मेदवार तथा समर्थकहरूलाई धम्क्याउने तथा आक्रमण गर्ने गरेकाले उपनिर्वाचन स्वतन्त्र र निष्पक्ष हुनेमा आशंका लागेको पराजुलीको भनाइ छ । उनले लोकतन्त्रको मूल्य र मान्यताविपरित भइरहेका सरकारी पक्षका गैरक्रियाकलापको पार्टीले निन्दा गरेको पनि बताए ।
‘उम्मेदवारका सवालमा हामीले अन्तिम समयसम्म पनि प्रक्रिया प्रक्रिया भनिराख्यौ हामीसँग त्यसो भन्नु बाध्यता थियो’, पराजुलीले भने, ‘पुराना दलहरूले अपराध जस्तो निकृष्ट व्यवहार उपयोग गर्नुहुन्न जस्तो लागेको थियो ।’
उनले हुम्लाको सर्केगाड लगायतका उम्मेदवारलाई अन्य राजनीतिक दलका नेता कार्यकर्ताले राजनीतिमा कहिल्यै नआउने शर्तमामात्र छोडिएको बताए ।
