काठमाडौँ । प्रतिनिधि सभाअन्तर्गतको अर्थ समितिका सभापति सन्तोष चालिसेले समिति बैठकमा गणपूरक संख्या नपुग्दा अप्ठ्यारो परेको गुनासो गरेका छन् ।
आइतबार सिंहदरबारमा बसेको अर्थ समिति बैठकमा भएको भन्सार ऐनका विषयमा सरोकारवाला निकायहरूसँगको छलफलमा समयमा सांसदहरू उपस्थित नहुँदा १५ मिनेटका लागि बैठक स्थगित गरेर दोस्रो बैठक बसेको हो ।
बैठकपछि सांसदहरूसँग गुनासो गर्दै अर्थ समितिमा आएका विधेयकहरूको जिम्मा सभापतिको मात्रै नभएको भन्दै सबै सदस्यहरूको दायित्व भएको स्मरण गराए । उनले चार दिनअघि बैठकको जानकारी दिँदा पनि एक तिहाइ सांसद पनि बैठकमा उपस्थित नहुँदा बैठक सञ्चालनमा समस्या भएको गुनासो गरे । उनले समयमा सांसदहरू बैठकमा जानकारी गराउने विषयमा सबै पार्टीका प्रमुख सचेतकहरूसँग छलफल गर्ने जानकारी दिए ।
उनले भने,‘अर्थ समिति बैठक राख्दा कहिल्यै पनि गणपूरक सख्या नपुग्ने अवस्था सिर्जना भएको छ । सबै पार्टीको केन्द्रीय कमिटी बैठक भएकाले समिति बैठक रोकेर राख्यौँ । चार दिनअघि बैठक बोलाउँदा पनि एक तिहाइ पनि संसद् बैठकमा उपस्थिति नहुने अवस्था सिर्जना भयो ।’
सभापति चालिसेले समितिमा अहिलेसम्म ५८ भन्दा बढी उजुरी परेको बताए । उनले समितिले उजुरीको विषयमा उपसमिति बनाएर काम गर्नेगरी अघि बढेको बताए ।
