काठमाडौँ । राष्ट्रिय स्वतन्त्र पार्टी (रास्वपा) ले आफ्ना सभापति रवि लामिछानेको हिरासत बसाई लम्ब्याउने प्रतिशोधपूर्ण प्रयास भइरहेको जिकिर गरेको छ ।
कार्यवाहक प्रवक्ता मनिष झाले बुधबार जारी गरेको विज्ञप्तिमा हिरासतमा राखेर अनुसन्धान गर्नुपर्ने आधार र कारण नभए पनि एकपछि अर्को म्याद थप्दै लामिछानेको हिरासत बसाई लम्ब्याउने प्रतिशोधपूर्ण प्रयास भइरहेको बताएका हुन् ।
हिरासत बाहिर रहेर पनि अनुसन्धान गर्न सकिने कानुनी प्रबन्धको कार्यान्वयनका लागि रास्वपाले सम्बद्ध सबैको ध्यानाकर्षण गराएको छ ।
रास्वपाले सभापतिलाई राजनीतिक पूर्वाग्रह प्रेरित भई गरेको दाबी गर्दै पोखरामा मंगलबार भएको शान्तिपूर्ण प्रदर्शनमा भएको प्रहरी हस्तक्षेपको पनि भर्त्सना गरेको छ ।
संसदीय छानबिन समितिले अनुसन्धान गरी सहकारीको बचत अपचलनमा पार्टी सभापति लामिछानेको संलग्नता नरहेको स्पष्ट पारे पनि सरकारले सहकारी ठगीसहित सङ्गठित अपराध र सम्पत्ति शुद्धीकरणमा समेत अनुसन्धान अगाडि बढाएको रास्वपाको जिकिर छ ।
