२३ कात्तिक, काठमाडौं। नेपाली कांग्रेसले स्थानीय तह उपनिर्वाचनका लागि चार स्थानका उम्मेदवार टुंगो लगाएको छ । अध्यक्षका लागि निर्वाचन हुने मोरङको ग्रामथान गाउँपालिका र दैलेखको महाबु गाउँपालिकाको उम्मेदवार निश्चित गरिएको छ।
उपाध्यक्षका लागि निर्वाचन हुने दोलखाको गौरीशंकर गाउँपालिका र जाजरकोटको नलगाड नगरपालिकामा उम्मेदवारको चयन भएको छ। उपाध्यक्षका लागि निर्वाचन हुने थप स्थानहरु हुम्लाको सर्केगाड, पूर्वी रुकुमको पुथाउत्तरगंगा र बाजुराको स्वामिकार्तिक खापरमा उम्मेदवार टुंगो लागिसकेको छैन ।
मोरङको ग्रामथानमा गाउँपालिका अध्यक्ष पदमा कांग्रेसले बलराम सरदारलाई उठाउने भएको छ । अध्यक्षमा आकांक्षा राखेका १३ जनामध्येबाट सरदारको नाममा जिल्ला संसदीय बोर्डले सहमति जुटाएको हो ।
सरदार पूर्वमहासमिति सदस्य हुन्। गत निर्वाचनमा यस पालिकामा कांग्रेसका उम्मेदवारले जितेका थिए । जयप्रकाश गच्छदार थारुको निधन भएकाले उपनिर्वाचन हुन लागेको हो ।
कांग्रेसले दैलेखको महाबु गाउँपालिका अध्यक्षको उम्मेदवार झलकबहादुर भण्डारीलाई बनाउने भएको छ । अध्यक्षमा उम्मेदवार हुन इच्छा राखेका १५ जनाबाट भण्डारीको नाम चयन गरिएको हो ।
जाजरकोटको नलगाड नगरपालिकाको उपप्रमुखमा कांग्रेसले इन्द्रा चन्द सिंहलाई टिकट दिएको छ । दोलखाको गौरीशंकर गाउँपालिकामा पासदिकी शेर्पा तामाङलाई उपाध्यक्षको उम्मेदवार बनाउने निर्णय कांग्रेसले गरेको छ । तामाङ निधन भएका यसपालिकाका पूर्व उपाध्यक्ष श्यामसुन्दर तामाङकी पत्नी हुन् ।
बाजुरास्थित स्वामीकार्तिक खापर गाउँपालिका उपाध्यक्षको उम्मेदवारमा पुल्तीसरा शाहीको नाममा सहमति जुटेको जिल्ला तहका नेताले जानकारी गराए । एकीकृत समाजवादीसँग चुनावी तालमेलको कुरा चलिरहेकाले नाम सार्वजनिक नगरिएको उनले बताए । जिल्ला तहका ती नेताले भने, ‘पुल्तीसरा शाही कांग्रेसले उठाउने निश्चित भयो । एकीकृत समाजवादीसँग पनि साथ खोजेका छौं । उहाँहरुसँग कुरा भएपछि नाम सार्वजनिक हुन्छ ।’
हुम्लास्थित सर्केगाड गाउँपालिका उपाध्यक्षको उम्मेदवार शनिबार टुंगिने जिल्ला सभापति मोहनविक्रम सिंहले जानकारी गराए । सर्केगाडमा कांग्रेसबाट सुशीला शाही, रतनकला रोकाया, सविता बुढा लगायतले टिकटको दाबी गरेका छन् ।
कांग्रेसले रुकुम पूर्वस्थित पुथाउत्तरगंगा गाउँपालिकाको उपाध्यक्षको उम्मेदवार छनोट गरिसकेको छैन । अघिल्लोपटक पराजित कमला कुमारी मल्ललाई उठाउने तयारी कांग्रेसले गरेको छ ।
कीर्तिपुरको मेयर उम्मेदवार टुंगो लाग्न बाँकी
मेयर पदका लागि काठमाडौंको कीर्तिपुर नगरपालिकामा पनि चुनाव हुँदैछ । कांग्रेसबाट ११ जनाको नाम नगर समितिबाट सिफारिस भए पनि टुंगो लागिसकेको छैन ।
विधानतः नगरको मेयर उम्मेदवार चयन गर्ने अधिकार प्रदेश संसदीय समितिलाई हुन्छ । बागमतीका प्रदेश सभापति इन्द्र बानियाँले सिफारिस भइ आएका सबै उम्मेदवार योग्य रहेको बताए । उनले भने, ‘तल्लो तहबाट आएका सबै उम्मेदवार हुन योग्य छन् । हामीले चुनाव जित्ने र योग्य उम्मेदवार छान्छौं ।’ बानियाँले १÷२ दिन भित्रमा उम्मेदवार चयन हुने जानकारी गराए ।
कांग्रेसले निर्वाचन परिचालनका लागि महामन्त्री विश्वप्रकाश शर्माको संयोजकत्वको समिति गठन गरेको छ । उक्त समितिले सातै प्रदेशमा समन्वय गर्ने गरी नेताहरुलाई जिम्मेवारी समेत दिएको छ ।
उपनिर्वाचनका लागि प्रदेशगत समन्वय र सहजीकरण गर्न बागमतीमा महालक्ष्मी उपाध्याय ‘डिना’, कोशीमा भीष्मराज आङ्देम्बे, मधेशमा महेन्द्र यादव, कर्णाली र गण्डकीमा जीवन परियार, सुदूरपश्चिममा एनपी साउद र लुम्बिनीमा पु्ष्पा भुसाललाई जिम्मेवारी तोकिएको छ ।
२ जिल्ला समन्वय समिति प्रमुखसहित ४४ पदका लागि आगामी मंसिर १६ गते उपनिर्वाचन हुँदैछ ।
