उपप्रधानमन्त्री एवं शहरी विकास मन्त्री प्रकाशमान सिंहले पुर्खाले सुम्पिएको समृद्ध संस्कृतिको रक्षा गर्दै नयाँ पुस्तालाई हस्तान्तरण गर्नुपर्ने बताएका छन्।
सोमबार काठमाडौंमा आयोजित तमु ल्होसार महोत्सवमा सम्बोधन गर्दै उनले नेपाल कला, सँस्कृति र परम्पराका हिसावले अत्यन्त समृद्ध रहेको भन्दै त्यसलाई संरक्षण गर्न जागरुक हुनुपर्नेमा जोड दिए।
महोत्सवले गुरुङ समुदाय आफ्नो पहिचानका लाग अत्यन्त जागरुकता देखाएको उनले सुनाए। देशमा प्रजातान्त्रिक व्यवस्था आइसकेपछि बहुजातिय, बहुभाषिक, बहुधार्मिक नेपाली समाजमा रहेका सबै धर्म, भाषासंस्कृतिले स्वतन्त्रतापूर्वक आफ्नो पहिचानलाई सुरक्षित राख्दै अझ समृद्ध गर्न पाएको पनि उल्लेख गरे।
‘तपाईंहरुको महोत्सवमा यस वर्ष सहभागिता उल्लेख्य देखिएको छ। यसले आफ्नो भाषा, धर्मसँस्कृति, रहनसहन, पुर्खाले छाडेर गएका रितिथिति परम्परा जोगाउन वर्तमानमा सक्रिय भए जोगिनेरहेछ भन्ने देखाउँछ,’ उपप्रधानमन्त्री सिंहले भने, ‘पुर्खाले हामीलाई सुम्पिएको अत्यन्त समद्ध संस्कृति नयाँ पुस्तालाई हस्तान्तरण गर्नुपर्छ। जुन अधिकार प्राप्त गरेका छौं, त्यसलाई संरक्षण र सम्वद्र्धन गर्नका लागि जिम्मेवार तवरले हामीले आफ्नो अधिकार प्रयोग गर्दा कसैलाई अप्ठ्यारो नहुनेगरि प्रयोग गर्दा त्यसले राम्रो गर्छ भन्नेमा ध्यान दिन जरुरी छ।’
महोत्सवमा गुरुङ समुदायको उपस्थिती, कला, संस्कृति,परम्पराको प्रस्तुतीले आफ्नो पहिचान कायम गर्न अत्यन्त जागरुक देखिएको भन्दै उनले नयाँ पिँढीलाई परम्पराको हस्तान्तरण गरिरहेकोमा बधाई ज्ञापन गरे।
राष्ट्र र समाजलाई उन्नत, सम्पन्न बनाउन सबैलाई आफ्नो शक्ति लगाउन पनि उपप्रधानमन्त्री सिंहले आग्रह गरे। गुरुङ समुदायले नयाँ वर्षका रुपमा मनाउने तमु ल्होसारको अवसरमा काठमाडौंको टुंडिखेलमा महोत्सवमा आयोजना गरिएको हो।
