२९ कात्तिक, सुर्खेत । नेकपा एमालेले दैलेखको महाबु गाउँपालिकाको अध्यक्षमा एकीकृत समाजवादी छाडेका जंगबहादुर शाहीलाई उम्मेदवार बनाउने भएको छ ।
१६ मंसिरमा हुने उपनिर्वाचनमा शाहीलाई उम्मेदवार बनाउने निर्णय गरिएको एमाले केन्द्रीय सदस्य निरज आचार्यले जानकारी दिए । तर यसको औपचारिकता दिन भने बाँकी रहेको एमालेले जनाएको छ ।
यसअघि नेकपा एकीकृत समाजवादीको केन्द्रीय सदस्य रहेका शाहीलाई गाउँपालिकाको अध्यक्षको उम्मेदवार बनाउने शर्तमा २७ कात्तिकमा मात्र एमालेले पार्टीमा स्वागत गरेको थियो ।
कर्णालीका मुख्यमन्त्री समेत रहेका एमाले स्थायी कमिटी सदस्य यामलाल कँडेलले दैलेखमा आयोजित एक कार्यक्रमका बीच शाहीलाई एमालेमा भित्र्याएका थिए ।
शाही २०७४ सालमा पनि महाबु गाउँपालिकाको अध्यक्षमा निर्वाचित भएका थिए । २०७९ को निर्वाचनमा पनि पुनः अध्यक्षका उम्मेदवार बनेका उनी कांग्रेसका लक्ष्मण गुरुङसँग पराजित भएका थिए ।
यस पटक शाहीको सम्भावना बलियो देखेर जिल्ला कमिटीले उनैलाई सर्वसम्मत उम्मेदवार बनाएको एमाले नेताहरू बताउँछन् ।
गाउँपालिका अध्यक्ष गुरुङको २७ माघ २०७९ मा निधन भएपछि त्यहाँ उपचुनाव हुन लागेको हो । महाबुको अध्यक्षमा कांग्रेसले झलकबहादुर भण्डारीलाई उम्मेदवार बनाएको छ भने राष्ट्रिय स्वतन्त्र पार्टीले प्रकाश बुढालाई उम्मेदवार बनाएको छ ।
