काठमाडौँ । महिला दुर्व्यवहारको मुद्दामा राष्ट्र बैंकबाट बर्खास्तीमा परेका थानेश्वर आचार्यले सफाइ पाएका छन् । प्रशासकीय अदालतले उनलाई हटाउने राष्ट्र बैंक सञ्चालक समितिको निर्णय बदर गरिदिएको हो ।
प्रशासकीय अदालतका अध्यक्ष डिल्लीराज घिमिरे र सदस्यद्वय रिता मैनाली र कृष्णप्रसाद पौडेलको पूर्णइजलासले मंगलबार फैसला गर्दै राष्ट्र बैंक सञ्चालक समितिको उक्त निर्णय बदर गरिदिएको हो ।
उनलाई गत चैत ५ गते सेवाबाट हटाइएको थियो । अदालतको फैसलासँगै निष्कासित आचार्य पुनर्बहाली हुने भएका छन् । पुनर्बहाली भएपछि आचार्य भन्छन्, ‘प्रशासकीय अदालतबाट मैले क्लियरेन्स पाएको छु । (पीडित महिलाको नाम) मेरी दिदी हुन्, उहाँप्रति मेरो सम्मान छ ।’
पुस २७ गते राष्ट्र बैंकले नगरकोटमा आयोजना गरेको तनाव व्यवस्थापन सम्बन्धी दुईदिने कार्यक्रममा आचार्यमाथि बैंकका महिला कर्मचारीमाथि दुर्व्यवहार गरेको आरोप लागेको थियो ।
उनले दुर्व्यवहार गरेको आरोपपछि गठन भएको छानबिन समितिले दिएको प्रतिवेदनका आधारमा आचार्यलाई स्पष्टीकरण सोधेको र त्यसको जवाफ चित्त बुझ्दो नभएपछि बर्खास्त गरिएको उल्लेख गरिएको थियो ।
