युवराज पाण्डे !
१५ माघ, बुटवल ।
नेपाल विद्यार्थी संघ (नेविसंघ) लुम्बिनी वाणिज्य क्याम्पसको १२ औं इकाई अधिवेशन भव्य रूपमा सम्पन्न भएको छ। यो अधिवेशनले सिद्दार्थ श्रेष्ठको नेतृत्वमा ५१ सदस्यीय समिति सर्वसम्मत निर्वाचित गरेको छ। लामो समयसम्म विभिन्न कारणले अधिवेशन सम्पन्न हुन नसकेको अवस्थामा यो अधिवेशन सम्पन्न हुनु विद्यार्थीहरूको लागि महत्वपूर्ण उपलब्धि मानिएको छ।
अधिवेशनको अध्यक्षता नेविसंघ लुम्बिनी वाणिज्य क्याम्पसका उपसभापति ॐमहरी आचार्यले गरेका थिए। नेविसंघ केन्द्रीय सदस्य तथा केन्द्रीय प्रतिनिधि अशोक गौतम उपस्थित थिए। कार्यक्रमको औपचारिक सुरुवात विद्यार्थी नेता ऋषि पन्थीको स्वागत मन्तव्यबाट भएको थियो।
अधिवेशनको क्रममा केन्द्रीय प्रतिनिधि अशोक गौतमले नेविसंघको ऐतिहासिक योगदान, विद्यार्थी आन्दोलन र यसको भावी रणनीतिका बारेमा आफ्ना धारणा राख्दै विद्यार्थीहरूको हकहितका लागि नेविसंघले अझ प्रभावकारी भूमिका निर्वाह गर्नुपर्नेमा जोड दिए।
कार्यक्रममा नेविसंघ रुपन्देही जिल्ला कोषाध्यक्ष रोशन थापाले नेविसंघले खेल्ने नेतृत्वदायी भूमिकाको महत्वबारे चर्चा गर्दै नयाँ कार्यसमितिलाई शुभकामना दिए। त्यस्तै, स्ववियु लुम्बिनी वाणिज्य क्याम्पसका सचिव निराजन खरेलले विद्यार्थीहरूको शैक्षिक अधिकार र क्याम्पसको समग्र विकासमा नव-निर्वाचित समितिको महत्वपूर्ण भूमिका रहने विश्वास व्यक्त गरे।
कार्यक्रममा क्याम्पसका विद्यार्थीहरूको उल्लेखनीय उपस्थिति थियो। सहभागीहरूले नेविसंघको क्रियाशीलता र यसले विद्यार्थीहरूलाई दिने प्रभावकारी नेतृत्वको प्रशंसा गरे।
कार्यक्रमको समापनमा अध्यक्ष ॐमहरी आचार्यले नव-निर्वाचित समितिलाई बधाई दिँदै आगामी दिनमा नेविसंघले विद्यार्थीहरूको आवश्यकता र समस्याहरूलाई प्राथमिकतामा राखेर काम गर्ने अपेक्षा व्यक्त गरे। साथै, अधिवेशन सफल बनाउन योगदान दिने सम्पूर्णलाई धन्यवाद ज्ञापन गर्दै कार्यक्रम समापन गरिएको घोषणा गरियो।
यो अधिवेशनले लुम्बिनी वाणिज्य क्याम्पसका विद्यार्थीहरूमाझ नेविसंघप्रतिको विश्वास अझ गहिरो बनाएको छ। नव-निर्वाचित समितिले आगामी दिनमा विद्यार्थीहरूको समस्याको समाधानका लागि निर्णायक पहल गर्ने विश्वास गरिएको छ।
