बुटवल । नेपाली कांग्रेस क्षेत्र नम्बर १ बाँकेले बिपी मार्गमा पदयात्रा सुरु गरेको छ । राष्ट्रिय एकता तथा मेलमिलाप दिवसको अवसरमा मंगलबारदेखि कांग्रेस क्षेत्र नम्बर १ बाँकेले बिपी मार्गमा पदयात्रा सुरु गरेको हो ।
बाँकेको कोहलपुरको खड्कवार हुँदै सल्यान घुइँयावारी जोड्ने उक्त सडकको विपी कोइरालाले शिलान्यासको तयारी गरेका थिए । तर राजा महेन्द्रले विस २०१७ साल पुस १ गते ‘कु’ गरेसँगै सडक निर्माणको काम अलपत्र परेको थियो । दुरीका हिसाबले छोटो भए पनि अलपत्र परेको उक्त सडक पुनः सञ्चालन गर्नका लागि दबाब दिने उद्देश्यले पैदलयात्रा सुरु गरेको क्षेत्रीय सभापति पोषण केसीले जानकारी दिए ।
उक्त पदयात्रा मंगलबार बिहान १० बजेदेखि सुरु भएको हो । उक्त पदयात्रा घुइँयावारी जोड्ने ठाउँसम्म पुग्ने छ ।
उक्त कार्यक्रममा कांग्रेसको एक सय दिने पार्टीको केन्द्रीय अभियानका बाँके जिल्ला प्रतिनिधि केन्द्रीय सदस्य कृष्ण किशोर घिमिरे, बाँके जिल्ला सभापति नारायण प्रसाद गौडेल, सचिव सुधांशु कोइराला एवं स्थानीयहरू सहभागी भएका छन् ।
चालु आर्थिक वर्षमा उक्त सडक निर्माणका लागि बजेट समेत विनियोजन भएको छ । विनियोजित बजेटलाई कार्यान्वयन गरी सडक सञ्चालनमा ल्याउनका लागि पदयात्राबाट दबाब दिने सभापति केसीले बताए ।
