मुम्बई । मनीषा कोइराला कयौँ भूमिकाबाट आफ्नो प्रतिभा प्रमाणित गरिसकेकी एक चर्चित अभिनेत्री हुन् । सन् १९४२: अ लभ स्टोरीमा अभिनय गरेपछि प्रसिद्धि हासिल गरेकी नायिकाले हालै पिंकभिलासँगको एक अन्तर्वार्तामा स्टारडमले उनलाई अलि घमण्डी बनाएको र केही गल्तीले गर्दा पछुताउने गरेको बताएकी छन् ।
मनीषालाई करियरको ठुलो सङ्क्रमणकालमा उनको व्यक्तित्वको विकास कसरी भयो र त्यसबेला आफूलाई अर्कै व्यक्ति जस्तो महसुस भयो कि भएन भनेर सोधिएको थियो । जवाफमा कोइरालाले भनिन्, ‘हो, म परिवर्तन भएँ जस्तो लाग्छ। म अलि घमण्डी भएँ जस्तो लाग्यो। धेरै मिहिनेत नगरी जब सफलता छिट्टै आउँछ, परिवर्तन अपरिहार्य हुन्छ। अनि यदि तपाईं अपरिपक्व हुनुहुन्छ, जवान हुनुहुन्छ भने तपाईंले न त संसारको बारेमा न आफ्नो बारेमा धेरै बुझ्नुहुन्छ ।’
उनले थपिन्, ‘त्यसैले मलाई लाग्छ कि यसले तपाईंलाई थोरै घमण्डी बनाउँछ, तपाईं सोच्नुहुन्छ कि तपाईं नै ‘संसारको केन्द्र’ हुनुहुन्छ । तर तपाईं हुनुहुन्न । जुन कुरा तपाईं परिपक्व र जीवनमा अघि बढ्दै जाँदा महसुस गर्नुहुन्छ । त्यतिबेला चाहिँ मलाई आफू ब्रह्माण्डको केन्द्र जस्तो महसुस भयो।’
दिल सेकी अभिनेत्रीले थपिन्, ‘मैले केही गल्तीहरू गरेँ जसको आज मलाई पछुतो छ, तर मलाई लाग्दैन कि मैले कुनै ठुलो गल्ती गरेँ। मेरो मतलब, यदि मैले जीवनमा कुनै गल्ती गरेँ भने, मैले ती आफ्नै लागि गरेँ। यसमा मैले अरू कसैलाई चोट पनि पुर्याएको हुन सक्छ।’
उनले भनिन्, ‘किनकि म एक संवेदनशील व्यक्ति हुँ। साथै, मेरो जीवनको ठुलो कारक मेरो आमा र बुबा हुनुहुन्थ्यो, जसले म जतिसुकै उडे पनि, मलाई पृथ्वीमा फिर्ता ल्याएर भन्नुहुन्थ्यो, ‘सरल बन ।’
मनीषाले सुभाष घईको सन् १९९१ मा आएको फिल्म सौदागरबाट बलिउडमा डेब्यु गरेकी थिइन्। उनी हालै सन्जय लीला भन्सालीको शृङ्खला हीरामन्डी: द डायमन्ड बजारमा देखिएकी थिइन् ।
@एजेन्सी
